【Emily】「戲劇教父」坐鎮藝團入校教300基層生

【明報專訊】大灣區共同家園青年公益基金及德天社會企業聯合推出「藝術欣賞體驗計劃」，培養學生對欣賞及參與藝術創作嘅興趣。多個本地藝團今年6、7月會去中學教學生唔同演藝嘅入門知識同埋香港表演文化特色，來自10間本地中學共300名基層初中生將會受惠。

每間學校會有30名初中生參加共6堂、每堂約1.5小時嘅藝術課，包括演藝欣賞、當代舞、話劇、芭蕾舞、古典音樂同音樂劇，同學完成所有體驗課後會走出學校，去劇場或音樂廳欣賞演出。參與學校日後可安排學生去大灣區其他城市做藝術交流，活動費用會由基金資助。

計劃會邀請有「戲劇教父」之稱嘅毛俊輝擔任總顧問，著名年輕指揮家林屴汧則為藝術總監。導師同藝團方面，包括劇場藝術家胡寶秀、香港芭蕾舞蹈團、城巿當代舞蹈團、香港話劇團、演戲家族同本地樂團等。毛俊輝話，希望建立一套有系統嘅方式，傳授欣賞表演藝術嘅入門知識，課程亦會融入中華文化或本地文化元素。