【時報訊】政府成日話要「搶人才、搶企業」，一直負責協助外地企業喺香港擴展業務嘅投資推廣署自然要更加落力。根據署方數據，今年上半年佢哋已經協助超過200間內地同海外企業來港同擴展業務，當中有五分之一企業從事消費產品、旅遊及款待，不過署方就無透露公司名或來自邊度。
近年大受歡迎嘅日本著名藥妝連鎖店松本清，都係經過投資推廣署介紹香港嘅營商環境、藥劑製品同埋藥物進口條例後，喺上年5月進駐香港，一年間開6間分店。另一間日本公司QB House都係由該署引入香港發展，數數手指，2005年落戶香港嘅QB House已經來港18年，至今有超過60間分店。
原來投資推廣署嘅旅遊和款待行業小組每年都會四出拜訪，接觸來自世界各地嘅餐飲企業，幫佢哋拓展香港業務同豐富本港嘅美食選擇。其中一間嚟自新加坡嘅社企餐廳廚尊（Dignity Kitchen）2019年12月喺旺角開首間門市，除咗標榜地道新加坡美食，仲積極僱用殘障人士，鼓勵佢哋自力更生。
