【時報訊】近年騙案數字不斷上升，警務處長蕭澤頤噚日喺活動上話，內地官員係唔會直接致電市民，市民如收到自稱內地官員嘅電話可以直接收線，「101%係騙案」，仲話如果真係有內地官員有事致電市民，「你嚟搵我」。
37公司參與新界北防罪聯盟
新界北總區防止罪案辦公室去年10月展開「新界北防罪聯盟計劃」，邀請區內唔同嘅公、私營企業同機構加入「防罪聯盟」，向公司員工同客戶發放防騙資訊。計劃至今已經有37間公司參與，警方噚日喺銅鑼灣警官會所向佢哋頒發嘉許狀。
蕭澤頤話，警方除咗有為聯盟成員舉辦36場防騙資訊講座，仲透過唔同方法將資訊宣傳畀其他市民，例如喺電影放映前同喺過海隧道播放防騙信息。新界北總區防罪科總督察黃長興提到，今年首5個月，新界北總區錄得超過3800宗騙案，聯盟成員會透過不同方法，包括前線員工喺收銀時向顧客派發防騙宣傳單張，至今已經派發超過20萬張。
