【時報訊】政府有份出資支持嘅網上仲裁平台一邦國際網上仲調中心（eBRAM），除咗搞網上仲裁同調解服務，再下一城推出交易促成平台（deal making platform），主攻跨境交易。一邦噚日又同數碼港、科技園公司、會計師公會、貿發局、中華總商會等15個機構簽訂策略伙伴協議，齊齊對外推廣香港法律交易促成角色，律政司前司長鄭若驊都以亞洲國際法學院主席身分出席。
一邦主席蘇紹聰話，希望新平台可以向世界講好香港法律交易故事，幫到香港企業，特別幫中小企開拓商機。佢又話，平台具備法律約束力電子簽署服務、商業機構名錄等，可以促進跨境交易，如果有問題就可以用番一邦網上調解同仲裁功能。
副主席岑君毅就預告，出年第一季會推出埋智慧合同（smart contract）功能，喺交易唔同階段，提示公司同解決合規問題。
相關字詞﹕一邦國際網上仲調中心
