【時報訊】醫管局獲李嘉誠基金會捐款600萬元，資助17間公立醫院急症室引入人工智能（AI）技術，分析腦部電腦掃描（CT）影像，預計未來3年提供逾57萬次服務。有急症室醫生話，中風或交通意外等病人要照腦CT睇睇有無出血，瘀血會較易遺漏，日後會用肉眼同AI同步檢視腦部CT影像，減低「睇漏眼」風險。
醫管局前年起陸續引入AI技術分析胸肺同髖關節X光片，率先喺新界西同港島西聯網急症室同普通科門診試行。醫管局噚日公布，獲得李嘉誠基金會捐助引入AI分析腦CT影像，確定病人腦部損傷、腦內出血等緊急情况，即時分析同鎖定出血點。
基金會主席李嘉誠話，系統可支持放射科醫生等提供準確同分流決定，榮幸能為醫管局邁向未來、小步快走嘅飛躍作出貢獻。
公立醫院急症室醫生、醫學會會董李福基同Emily講，知道伊利沙伯醫院急症室已經試用緊上述技術，有公院出年會開始使用，到時如果AI發現有出血而肉眼見唔到，會先將病人收入病房，再將影像交畀放射科覆檢。
