【時報訊】渣打香港馬拉松下周日（21日）舉行，今年會再次見到港大法律學院首席講師張達明（Eric）嘅身影，佢今年繼續同阿女跑馬拉松，為紀念已故妻子嘅「香港防癌會張謝寶英乳癌康復資助計劃」籌款，目標係50萬元。截至噚日佢只係籌得2.7萬元，得目標5%。
喺防癌會網頁上，有唔少人留言支持Eric。有至少兩人分別一筆過捐款5000元。有不願具名嘅留言話：「謝謝你為有需要的病人出心出力！加油！」亦有網友話：「Eric加油，維園見！」
冀籌50萬 暫得2.7萬
上述資助計劃喺2007年成立，Eric喺社交網站話，至今已撥出650萬元善款，幫助超過1030個乳癌病人。佢提醒，計劃一直緊守原則，捐款一分一毫都會畀有需要病人，唔收行政費。
